UŞAQLAR ÜÇÜN

Fiziki aktivlik - enerji sərf edən bədən hərəkətləridir və hər kəs üçün faydalıdır. Mütəmadi hərəkətlər qeyri-infeksion  xəstəliklərin  yaranma  riskini azaldır. Fiziki aktivlik oynaqlar, əzələ və sümükləri möhkəm və güclü edir.

Gündəlik fiziki fəaliyyətlə məşğul olmaq və məşq etmək bədənin gücünü artırmağa, daha dözümlü olmağa, sağlam və xəstəliklərdən uzaq həyat yaşamağa kömək edir.

Uşaqlar üçün çoxlu idman bölmələri var, lakin onlardan birini seçmək olduqca çətindir. Ancaq seçim etmək vacibdir, çünki bədən tərbiyəsinin erkən və mütəmadi vərdişi həyat boyu sağlam bədənə sahib olmağı təmin edir. Bu səhifədə biz uşaqların yaşından, bədən quruluşundan və sağlamlıq vəziyyətindən asılı olaraq idman növlərindən danışacayıq.

İnkişafda olan cavan orqanizmə oturaq həyat tərzi hiss olunacaq dərəcədə mənfi təsir göstərir. Məktəb yaşlı uşaqların oyaq vaxtının 50-70%-ini oturaq vəziyyətdə keçirməsi bu problemi daha da dərinləşdirir. Oturaq həyat tərzi keçirən uşaqlarda qan dövranı ləngiyir, nəticədə daxili orqan və sistemlərin qidalanması pozulur. Bədənin sağlamlığını qorumaq üçün daima fiziki aktivliklə məşğul olmaq lazımdır.

Fiziki cəhətdən aktiv olmaq və sağlam həyat tərzi sürmək gözəl bədənə və uzun ömürlülüyə sahib olmaq üçün əsas qaydalardan biridir. Fiziki aktivlik və idman orqanizmi gücləndirməklə yanaşı, sağlamlığa yalnız fayda gətirməlidir. Ona görə bədən və əzələ kütləsini artırmaq istəyən hər bir şagird fitnes asılılığı, bodibildinq və anabolik steroidlərlə əlaqəli potensial risklərdən xəbərdar olmalıdır. Bəzi idmançılar qısa müddətdə təsirli nəticələr əldə etmək  üçün qeyri-qanuni anabolik maddələrə müraciət edirlər. Zamanla qazanılan əzələ kütləsini itirməmək üçün bodibildinqlə məşğul olanlar kimyəvi qatqılara və steroidlərə aludə olurlar. Bu maddələrin əzələ kütləsini artırmağa kömək etməsinə baxmaraq, orqanizmin umumi sağlamlıq vəziyətinə ciddi ziyan vurması da qaçınılmazdır. Ürək, mədə-bağırsaq sistemi, qaraciyər problemləri yaradan kimyəvi qatıqlar, əsəb-stress və gərginlik hallarına da yol açır. Ona görə həkim təyinatı və məsləhəti olmadan anabolik və digər sintetik dərmanların qəbulu məsləhət görülmür. Fitnes asılılığı (Bodibildinq və anaboliklər) barəsində daha ətraflı  səhifəmizdə oxuya bilərsiz.