UŞAQLAR ÜÇÜN

Sağlam qidalanmaq – orqanizmin möhkəmlənməsinə, sağlam böyüməyə, müxtəlif xəstəliklərin qarşısını almağa istiqamətlənən faydalı qidalara üstünlük vermək deməkdir. Sağlam qidalanmaq şəkərli diabet, ürək xəstəlikləri, yüksək təzyiq, xərçəng də daxil olmaqla bir çox qeyri-infeksion xəstəliklərin (QİX) qarşısını alır. Qidalanmada tərkibi vitamin və minerallarla zəngin ərzaqlara üstünlük vermək lazımdır. Bu bölməni sağlam qidalanmaq üçün köməkçi vasitə kimi istifadə edə bilərsiz.

Uşaq məktəbə getməyə başlayandan onun sağlam qidalanmasına olan tələblər daha da artır, çünki məktəblilər yüksək psixoloji və zehni  yükləmələr keçirirlər. Fəal şəkildə böyüməyə davam edən bədənin qidalanmasına kifayət qədər diqqət yetirilməlidir. Bu bölmədə 7 yaşdan yuxarı uşaqların əqli və fiziki inkişafı üçün hansı qidalara ehtiyacı olduğunu, bir şagirdin gündəlik nə qədər qida qəbul etməli olduğunu, qidalanma menyusunu necə ən yaxşı şəkildə qurmağı öyrənəcəksiniz.

Əziz uşaqlar, müasir dövrdə görünüşü və ətri ilə cəlbedici görünən yeməklərin heç də hamısı  orqanizm üçün faydalı deyil. Əksinə, sizin çox sevdiyiniz, xüsusi görünüşü və dadı ilə diqqətinizi cəlb edən qidalar çox vaxt ən zərərlisidir. Onların orqanizmə göstərdiyi ziyanı barədə, xüsusi ilə də sağlamlığınızı zədələyən, müxtəlif xəstəliklər yaradan fast-fud və tez hazır olan yeməklər barədə vacib məlumatları diqqətinizə çatdırmaq istəyirik.

Məktəblilər sağlam qidalanmaya çox diqqət etməlidir. Çünki sağlam qidalanma orqanizmi vitamin və minerallarla təmin edir. Qidalardan alınan vitamin və minerallar immuniteti və fiziki gücü artırır, yaddaşın və görmə qabiliyyətinin azalmasının qarşısını alır, bütün bədənin möhkəmliyini təmin edərək sağlam və xəstəliklərdən uzaq həyat yaşamağa kömək edir. Bir məktəblinin gündəlik rasionu müxtəlif çeşiddə təzə meyvə və tərəvəzlərlə zəngin olmalıdır.