VALİDEYNLƏR ÜÇÜN

Uşaqların dərsləri unutması, diqqətlərinin yayınması və tapşırıqlara köklənə bilməməsi valideynləri narahat edən əsas problemlərdəndir. Çox zaman bu hallar uşağın tənbəlliyi və ya zəif yaddaşı ilə əlaqələndirilsə də, əsl səbəblər valideyn yanaşmasında gizlənə bilər. Budur, bu sahədə ən çox rast gəlinən 5 valideyn səhvi:

1. Uşaqdan böyüklər səviyyəsində davranış gözləmək

Uşaqlar hələ diqqət və yaddaş mexanizmlərini yeni-yeni formalaşdırırlar. Valideynlərin "Niyə bunu unutdun?", "Neçə dəfə demək olar?" kimi ifadələri uşağın özünəinamını sarsıda bilər. Halbuki uşaq sadəcə bu bacarığı inkişaf etdirməyə çalışır.

Doğru yanaşma: Yaşına uyğun gözləntilər qurun və hər uğuru müsbət şəkildə dəyərləndirin.

2. Həddindən artıq müdaxilə etmək

Valideynlərin tez-tez "öz yerinə tapşırığı etməsi", "çantasını yığması" və ya "xatırlatmalarla dolu gün planı hazırlaması" uşağın məsuliyyət hissini zəiflədir. Nəticədə uşaq özü təşəbbüs göstərməyə meyilli olmur.

Doğru yanaşma: Uşağa sadə tapşırıqları özü yerinə yetirmək fürsəti verin. Səhv etsə belə, bu, onun öyrənmə prosesidir.

3. Müqayisə etmək

"Qonşunun uşağı hər şeyi yadda saxlayır", "bacın səndən daha diqqətlidir" kimi müqayisələr uşağın özünü dəyərsiz hiss etməsinə və diqqət dağınıqlığının artmasına səbəb ola bilər.

Doğru yanaşma: Hər uşağın fərdi inkişaf sürəti var. Onu yalnız özü ilə müqayisə edin – dünənki ilə bu günki versiyası arasında.

4. Yuxu və qidalanmaya laqeyd qanaşmaq

Kifayət qədər yatmayan və balanssız qidalanan uşaqlarda həm yaddaş, həm də diqqət zəifləyə bilər. Şəkərli və emal olunmuş qidalar beyin fəaliyyətini mənfi təsir edə bilər.

Doğru yanaşma: Günlük rejimə və sağlam qidalanmaya önəm verin. Omega-3, B qrupu vitaminləri və proteinlə zəngin qidalar diqqət və yaddaş üçün vacibdir.

5. Sadəcə tənqid edib, təlim verməmək

Uşaq tapşırığı unutduqda yalnız danlanırsa, o, nə etməli olduğunu öyrənmir. Ona "Necə yadda saxlamaq olar?" və ya "Tapşırığı necə təşkil edə bilərik?" kimi yollar göstərilməlidir.

Doğru yanaşma: Tənqid əvəzinə həll yolları təqdim edin. Birlikdə plan qurun, yadda saxlamaq üçün vizual dəstək və ya gündəlik istifadə edin.

Uşaqlarda diqqət və yaddaş bacarıqları zamanla inkişaf edir. Bu inkişafda valideynin dəstəyi tənqid deyil, anlayış, yönləndirmə və səbir olmalıdır. Unutmayın, siz uşağınızın ən böyük müəllimi və güvən yerisiniz.