VALİDEYNLƏR ÜÇÜN

Oturaq həyat tərzi nəticəsində qan dövranı yavaşıyır, orqan və toxumalara qan vasitəsi ilə daşınan oksigen və qida maddələri azalır. Qidalanmanın pisləşməsi orqanların normal inkişafının pozulmasına və patologiyaların yaranmasına səbəb olur. Müasir şəraitdə məktəblilərin dərslərlə həddən artıq yüklənməsi gün rejiminin pozulmasına səbəb olur, açıq havada olma müddəti qısalır, uşaqların fiziki fəallığı azalır!

İlk növbədə görüləcək tədbirlər:

Gün rejimini düzgün qurmaq, açıq hava gəzintilərinə vaxt ayırmaq lazımdır. Belə ki, açıq havada hərəkətli oyunlar orqanizmin möhkəmləndirilməsi ilə yanaşı, həmçinin  ultrabənövşəyi şüa çatışmazlığı və hipodinamiyanın profilaktikasında da təsirli vasitədir. Məktəblilər ev tapşırıqlarından əvvəl və sonra, eləcə də gecə yuxusundan əvvəl açıq havada olmalıdırlar. 1,5-2 saat açıq havada olduqdan sonra iş qabiliyyəti yüksəlir.

Oturaq həyat tərzinin məktəb yaşlı uşaqlara zərəri.

Məktəblilərin oyaq vaxtının 50-70 %-ini oturaq vəziyyətdə keçirməsi qan dövranını ləngidir, nəticədə daxili orqan və sistemlərin qidalanması pozulur. Ölkəmizdə 2014-cü ildən etibarən həyata keçirilən uşaqların icbari dispanserizasiyanının monitorinqi və qiymətləndirilməsinin nəticələrinə görə, 9-14 yaşda məktəb şagirdləri arasında ən çox yayılan və erkən yaşlarda qazanılan əsas xəstəliklər görmə qabiliyyətinin zəifləməsi və onurğa sütununun əyilməsi ilə əlaqədardır.

Görmə qabiliyyətinin zəifləməsi.

Göz üçün təhlükəli şüa yaradan texniki vasitələrdən (kompüter, telefon, planşet) həddən artıq istifadə görmə qabiliyyətinin zəifləməsinə gətirib çıxaran əsas problemlərdən biridir.

Valideynlər üçün:

Övladınız yazı yazarkən başını dəftərə doğru çox əyirsə, yaxud sağ və ya sol gözünü sıxaraq daha diqqətlə baxmağa çalışırsa, bu artıq Xəbərdarlıq əlamətidir.

Onurğa sütununun əyilməsi

Məktəb yaşlı uşaqlarda düzgün oturma bacarığı olmadığından, onların onurğa sütunu bir çox hallarda deformasiyalara məruz qalır.

Ağır kürək çantasını və ya məktəb çantasını eyni tərəfdən asaraq daşımaq məktəbli uşaqların inkişaf etməkdə olan oynaq və əzələ strukturlarının inkişafında problemlərə gətirib çıxarır və nəticədə skolioz xəstəliyinin yaranmasına səbəb olur (onurğa sütunu “S” şəklini alır).

Profilaktik tədbirlər:

Ev tapşırıqlarını hazırlayarkən hər 15 dəqiqədən bir oturma tərzini dəyişdirmək lazımdır (eyni tərzdə uzun müddət oturmaq düzgün deyil).

Hər gün gəzinti və açıq havada oyunlar üçün vaxt ayırmaq lazımdır.

Uşaqlarda səhər idmanı və ümumiyyətlə, fiziki aktivlik kimi vərdişlər formalaşdırılmalıdır (gün ərzində idmana ayrılmış vaxt və təlimlər düzgün seçilərsə, onurğa və əzələlər güclənər, qamət düz olar).